وظف مشاعرك صح

ايه هو الحب

؟؟؟؟؟

اتنين يحبوا بعض ولا هو كلام جميل وبس

ولا هو ابتسامة وإعجاب
لا ده مش حب واللي فاكر ان ده حب يبقى بيضحك على نفسه و على غيره
ممكن اكون غلطت او انتي غلطتي او انت غلطت ممكن اكون معرض للغلط او انت او انتي
لكن الصح هو اننا لو عرفنا الغلط نحط خط احمر ونبعد عن الغلط
...........................................
الحب في سن المراهقه و المشاعر

عامله بالظبط زي الطفل الصغير اللي لسه بيتعلم المشي
لو اتعلم غلط ومشي على مزاجه هيطلع عنده إعاقة في رجليه وده بالظبط حال الشباب بيمشوا على مزاجهم
والتجارب بياخدوها من الافلام و المسلسلات اللي هي اساسا تعبير عن حالة نفسية للكاتب
وبناخد الكلام ده ويبقى هو المرشد لينا وده غلط لان في ناس تانيه هي اللي عارفه مصلحتك فين
يعني قبل ما تفكر في حاجه زي دي اسال والدك اسالي والدتك انا صح ولا غلط اسال شيخ اسال داعيه
حط لنفسك علامات لطريقك لكن مش تمشي وتتوه في طريق كله ظلام وتقول ادينا بنقضي وقت
لا ده غلط
..........................
كلمة دي زي اختي ده زي اخويا


انا سمعت حلقة "احب زميلتي في الجامعة" من برنامج من الآخر على قناة فور شباب
إتأكدت ان الكلمة دي غلط لأن توظيفها في الوقت ده هو حجه للتعامل الشاب مع الفتاه او العكس
لانها متنفعش تكون اختك وهو مينفعش يكون اخوكي لان في حاجه اسمها مشاعر و في حاجه اسمها عاطفة واحاسيس
وكل ده بيكبر بين الاتنين مع الوقت وللاسف بياخد الطريق الغلط بحجة دي زي اختي ده زي اخويا
...........................
وسلبيات الحب الغلط

ان الحواجز بتتكسر شويه شويه وتبدأ بورده ثم رسالة بريئة صباح الخيروبعد كده رسالة حب
وبعد كده ندخل في المشاكل وبعد كده يتصل وهي تتصل
وتروح ساعات طويلة في التفكير والاتصالات والمشاعراللي هي بدأت غلط من الاساس
وكلنا عارفين ان الاساس لو اتبنى غلط هيجي يوم و البيت كله هيدمر
ايه اللي ممكن نستفيده في العلاقة دي

غيربعد عن ربنا

تضيع كبير للوقت

تعلم خيانة الامانة ودي نقطه هتكلم فيها في الآخر

تعلم الكذب

الفشل

ممكن نوصل لاكتئاب

ممكن نوصل لطرق غلط خالص

وكل ده بسبب ايه

علاقة اتبنت على اساس غلط لانها اتبنت على معصية
....................................
طيب .. الحب
هتعمل ايه بحبك لبنت او انتي هتعملي ايه بحبك لولد
وبعد كده ممكن البنت دي يجلها واحد تاني من الباب وتتحول حياتها لحياه سعيدة
وانت كمان ممكن تلاقي واحد مناسبة اكتر وتدخل ليها من الباب
طيب ليه بنعذب نفسنا في طريق ناهيته غلط

أول خطوات الحب الصح

والحب اول خطواته بتيجي عن طريق الطريق الصح
بتيجي لما الشاب يكون قادر وبعد كده يتقدم رسميا للي شايف انها مناسبة
واللي بيمشي في الطريق الصح هو اللي بيكون اكتر واحد سعيد و الحب اللي بينهم بيزيد
لكن اللي ماشي في الطريق الغلط حتى لو هو دخل بعد كده من الباب
كل اللي عمله هو إنه قتل جزء كبير من المشاعر و الحب اللي مفروض تكون بينهم
......................................
الحب موجود كده كده

المشاعر دي والحب ده هيبقى موجود كده كده لان دي حاجه طبيعية
لكن على حسب الفراغ اللي هيبقى جواك هتحتاج للحب ده اكترعلشان كده حاول توظف المشاعر دي
ازاي

قرب اكتر من ربنا صلي السنن
إعرف نبيك اكتر
حب القرآن
حب أهلك وخلي علاقتك معاهم كلها حب
حب اخواتك واقعد معاهم كتير
ابحث عن صديق مخلص تحبه في الله
إشغل وقتك في فعل
صدقني هو ده اللي محتاجه علشان تقتل الفراغ ده
.....................................
الخيانه فين ؟!

وفي الآخر عايز اوضح ازاي بالحب الغلط ده انتي وانت بتخونوا الامانه

لما تروحي الكليه مثلا وتسيبي المحاضرات علشان تمشي مع واحد اللي زي اخوكي ده

مش ده خيانة لاهلك اللي فاهمين انك في المحاضرة

لما ترجعي ووالدتك تسالك كنتي فين تقولي كنت مع صحباتي مش دي خيانة للامانه

لما تتصل بيها وتكلمها ولما والدك يسالك بتكلم مين تقوله ده صاحبي عبد السميع او اما مامتك تسالك تقولى دى نورهان

مش ده كدب وخيانة

لما تكلفي اهلك فلوس قد كده في الكلية وغيرها وفي الآخر ماشيه غلط

مش ده حرام وخيانة للأمانه

طيب ازاي بقى نقول على ده حب وكل حاجه فيه غلط في غلط

ياريت نراجع نفسنا لان في الآخر كلنا هنموت ايه رايكم نموت على معصية ولا نموت على طاعة

وفي الآخر ده اختياروجزاء المعصية معروفة وجزاء الطاعة معروفة

ومن ترك شئ لله ابدله الله خير منه
...................................
والملخص

وظف مشاعرك صح

ضع علامات لطريقك بسؤالك لاهلك او داعية او شيخ

وفي الآخر اعرف انك هتتحاسب فحاسب نفسك قبل ان تحاسب

منقول انا قراته وعجبنى ياريت الجميع ينقله ويبعثه لاصدقاءه وتاخذ ثواب النصيحه

صح ياجيل عندك حق
ربنا يبارك فيكى
وياريت الشباب يفهمو دا يارب

بارك الله لك
ويارب في ميزان حسناتك
اللهم امين

جزاكى الله كل خير
الموضوع حلو اوى
وياريت كل البنات والولاد يفهموا كده ويتقربوا فعلا من ربنا

اولا : شكرا على الموضوع الرائع دة
ثانيا : انا موفقك على كلامك كلة فعلا بيحصل
ثالثا : بس اكيد مش ولا كل البنات كدة ولا كل الشباب كدة ولله فى الكويس وفى الوحش حكمك ميكنش بضال الشاب دة وحش يبقى كل الشبابا وحشين
ولا انا البنت دة كويسة يبقى كل البنات كويسين ولله فى الوحش وفى المحترم من الطرفين
رابعا : شكرا على الموضوع المتميز دة ويرات اعرف رايك فى الرد ازى كان صح او غلط

جزاكى اللة كل خير رباب على الموضوع

بالنيابه عن اختى الكريمه
كلامك جميل بس مش فيها حاجه لو نصحنا بعض ونخلى بالنا من بعض
وكمان اللى كويس يبقي احسن من كويس ويزيد ايمانه بالله ونبقا الجيل اللى
يتشرف بيه رسولنا امام الامم السابقه مثل انت تحب ان تتشرف باللى انت بتحبه امام
الناس وكذلك رسولنا الكريم وياريت فعلا نكون جيل مشرف ليه
واسفه اذا كنت ردتك بدلك واذا عندك تكمله كلامى ارجوكى كملى
شكرا ليكم